មូលនិធិហាប់ស្វែល

បេសកកម្មរបស់យើង៖  យើងមានបេសកកម្ម លើកកំពស់ស្ត្រីអ្នកដឹកនាំវ័យក្មេង ក្នុងតំបន់អាស៊ីអាគ្នេយ៍ ដោយផ្តល់​​នូវការអប់រំ បណ្តុះបណ្តាល និង​ការកសាងបណ្តាញជួយជ្រោមជ្រែងគ្នា។ យើងមើលឃើញថា ស្រ្តីអ្នកដឹកនាំជំនាន់ថ្មី​នឹង​បង្កើត ព្រមទាំងបំផុសគំនិតឱ្យមានការផ្លាស់ប្តូរវិជ្ជមានក្នុងសង្គម។ យើងជឿជាក់ថា សហគមន៍មួយដែលពោរពេញ ទៅដោយស្ត្រីប្រកបដោយការអប់រំ បង្កើតបានជាកម្លាំងដ៏រឹងមាំបំផុតដើម្បីនាំមកនូវភាពចម្រើនរុងរឿងដល់សង្គម និងសេដ្ឋកិច្ចក្នុងតំបន់អាស៊ីអាគ្នេយ៍ និង​ហួសពីនោះទៅទៀត ។ ការអប់រំ និង ភាពជាអ្នកដឹកនាំដែលមានចក្ខុវិស័យ ខ្ពស់ នាំមកនូវក្តីសង្ឃឹមដ៏ល្អបំផុតសម្រាប់ថ្ងៃអនាគត។ ជាអកុសល ស្ត្រីនៅក្នុងប្រទេសកម្ពុជា រងនូវគុណវិបត្តិមួយ បើធៀបទៅនឹងបុរស ដោយសារតែសាកលវិទ្យាល័យ មិនបានផ្តល់នូវលំនៅដ្ឋានសម្រាប់និស្សិតស្នាក់នៅ។ កង្វះលំនៅដ្ឋាននេះ  មិនមែនជាបញ្ហាធ្ងន់ធ្ងរសម្រាប់និស្សិតប្រុស ដែលអាចរស់នៅក្នុងវត្តព្រះពុទ្ធសាសនា ដោយពុំបាច់បង់ប្រាក់ ឬ អាចជួលផ្ទះនៅដោយសុវត្ថិភាពនោះទេ។ ផ្ទុយទៅវិញ និស្សិតស្រីមិនអាចរកកន្លែងស្នាក់នៅ ដោយងាយស្រួលឡើយ។ ដូច្នេះ ដោយសារកង្វះកន្លែងរស់នៅប្រកបដោយសុវត្ថិភាព ខណៈដែលពួកគេ កំពុងសិក្សានៅសាកលវិទ្យាល័យ ស្ត្រីវ័យក្មេងភាគច្រើននៅក្នុងប្រទេសកម្ពុជា ត្រូវបានរារាំងពីការទទួលបានការអប់រំ កម្រិតឧត្តមសិក្សា។

អ្វីដែលយើងធ្វើ៖ មូលនិធិហាប់ស្វែល ជ្រើសរើសសិស្សវិទ្យាល័យជាស្ត្រីរៀនពូកែ និងជោគជ័យ ដែលបានបង្ហាញភាពជាអ្នកដឹកនាំ ព្រមទាំងទស្សនៈវិស័យសម្រាប់អនាគតរបស់ពួកគេ។ មូលនិធិហាប់ស្វែល ផ្ដល់កន្លែងស្នាក់នៅ បន្ទប់គេង និង ការអប់រំបន្ថែមដល់សិស្សទាំងនេះនៅក្នុងអន្តេវាសិកដ្ឋានទំនើបទាំងពីររបស់ខ្លួនក្នុងរាជធានីភ្នំពេញ។ ពួកគេអាចចូលរៀនក្នុងសាកលវិទ្យាល័យណាមួយ នៅរាជធានីភ្នំពេញ និងស្នាក់នៅដោយសុវត្ថិភាពក្នុងអន្តេវាសិកដ្ឋានរបស់យើងសម្រាប់រយៈពេលបួនឆ្នាំ ហើយទទួលបានដោយឥតគិតថ្លៃនូវម្ហូបអាហារ អ៊ិនធឺណិត និងឱកាសដើម្បីជួបភ្ញៀវកិត្តិយស និងវាគ្មិនជាតិ និងអន្តរជាតិជាច្រើន។ មូលនិធិហាប់ស្វែល ផ្តល់នូវការអប់រំសំខាន់ៗបន្ថែមទៀតដូចជា ភាសាអង់គ្លេស កុំព្យូទ័រ ជំនាញការត្រិះរិះពិចារណា និងការបណ្តុះបណ្តាល ភាពជាអ្នកដឹកនាំ សម្រាប់ស្ត្រីវ័យក្មេងដែលត្រូវបានជ្រើសរើសមកកាន់កម្មវិធីរបស់យើង។ សិស្សដែលជ្រើសរើសដោយ មូលនិធិហាប់ស្វែល ត្រូវសិក្សាក្នុងសាកលវិទ្យាល័យណាមួយតែមួយគត់ និងត្រូវធ្វើការប្តេជ្ញាជាលាយលក្សណ៍អក្សរ ថាខ្លួននឹងរស់នៅក្នុងអន្តេវាសិកដ្ឋានសម្រាប់រយៈពេលបួន ឆ្នាំពេញលេញ រហូតដល់ពេលពួកគេបានទទួលសញ្ញាប័ត្រ។

អន្តេវាសិកដ្ឋាន៖ អន្តេវាសិកដ្ឋានទំនើបទាំងពីររបស់យើង មានទីតាំងក្បែរសាកលវិទ្យាល័យធំៗមួយ ចំនួន ក្នុងរាជធានីភ្នំពេញ។ និស្សិតរស់នៅក្នុងបន្ទប់មានផាសុកភាព ដែលមានគ្រែ តុរៀន និង ទូខោអាវ។ ក្នុងអន្តេវាសិកដ្ឋាន មានបន្ទប់ កុំព្យូទ័រ និងបណ្ណាល័យមួយ។ ចុងភៅរបស់មូលនិធិហាប់ស្វែល ចម្អិនអាហារថ្ងៃត្រង់និង​អាហារល្ងាចសម្រាប់និស្សិត រីឯអាហារពេល ព្រឹកនិស្សិតត្រូវចម្អិន រួមគ្នា។ និស្សិតត្រូវធ្វើការរួមគ្នា ក្នុងការរៀបចំកន្លែងស្នាក់នៅ រួមមានការលាង សំអាត និងសកម្មភាពផ្សេងៗ។ មូលនិធិហាប់ស្វែល មានសន្តិសុខធ្វើការពេញម៉ោងដើម្បីយាម  កាម និងរក្សាសុវត្ថិភាព។ បុគ្គលិកជាស្ត្រីទាំងអស់ រួមទាំងអ្នកតំណាងភាពជាអ្នកដឹកនាំជាស្ត្រីបរទេសវ័យក្មេង ដែលមកស្នាក់នៅក្នុង អន្តេវាសិកដ្ឋាន និង ជួយបង្រៀននិស្សិតរបស់យើង។

កម្មវិធីសិក្សាក្នុងអន្តេវាសិកដ្ឋាន៖ ដូចដែលបានពោលខ្លះៗពីខាងលើរួចមកហើយ​ យើងផ្តល់កម្មវិធីសិក្សាក្នុងអន្តេវាសិកដ្ឋានរួមមាន ថា្នក់ភាសាអង់គ្លេស ភាសាបារាំង កុំព្យូទ័រ ការពិភាក្សាឬជជែកដេញដោល ជំនាញការងារ ការត្រិះរិះពិចារណា ព្រមទាំងការ សរសេរវិភាគ។ និស្សិតទទួលបានព័ត៌មានយ៉ាងច្បាស់អំពីព្រឹត្តិការណ៍បច្ចុប្បន្ន និងចូលរួមក្នុងសកម្មភាពវប្បធម៍ជាច្រើន។ មូលនិធិហាប់ ស្វែលផ្តល់ជូនដល់និស្សិតនូវថ្នាក់រៀនតន្រ្តីដូចជា ព្យាណូ ហ្គីតា និង  វិយូឡុង ហើយនិស្សិតក៏បានរួមគ្នាបង្កើតជាក្លឹប តន្រ្តី ក្លឹបរៀនភាសាអង់គ្លេស ក្លឹបអានសៀវភៅនិងក្លឹបកីឡា ។ល។

អតីតនិស្សិត៖ និស្សិតរបស់យើងទទួលបានការគាំទ្រ ដោយពួកគេទទួលបានការណែនាំ និងជំនួយជាទៀងទាត់ពីអតីតនិស្សិតមូលនិធិហាប់ស្វែល។ និស្សិតបញ្ចប់ការសិក្សានៅតែមានទំនាក់ទំនងគ្នា តាមរយៈសមាគមអតីតនិស្សិតនៃមូលនិធិហាប់ស្វែល។ សូមចូលទស្សនាទំព័រហ្វេសប៊ុកអតីតនិស្សិតរបស់យើងដោយ ចុចនៅលើតំណនេះ។​   មូលនិធិហាប់ស្វែល បន្តគាំទ្រដល់និស្សិតបញ្ចប់ការសិក្សា តាមរយៈការបង្កើតកម្មវិធី និងឱកាស បណ្តាញទំនាក់ទំនងសង្គមបន្ទាប់ពីពួកគេបញ្ចប់ការសិក្សា។  យើងក៏បន្តផ្តល់កន្លែងស្នាក់នៅសម្រាប់និស្សិត រយៈពេលមួយឆ្នាំ ក្រោយពីពួកគេបានបញ្ចប់ការសិក្សា។

សមិទ្ធផលរបស់យើង៖ គិតត្រឹមខែកក្កដាឆ្នាំ ២០២៥ យើងមាននិស្សិតបញ្ចប់ការសិក្សា ចំនួន ២៦៩នាក់ ចាប់ផ្តើម ជាមួយថ្នាក់ នៃឆ្នាំ ២០១០។ និស្សិតបញ្ចប់ការសិក្សា​ របស់យើង បានធ្វើ ការជាមេធាវី នៅក្នុង ក្រុមហ៊ុនច្បាប់ អ្នកគ្រប់ គ្រងគម្រោងនៅក្ នុងអង្គការ មិនមែនរដ្ឋាភិបាល អ្នកកាសែត អ្នកគ្រប់ គ្រងហិរញ្ញវត្ថុ បុគ្គលិកនៅក្នុង ក្រសួងរដ្ឋាភិបាល គ្រូបង្រៀន និងជា សហគ្រិន។ និស្សិតបញ្ចប់ការសិក្សារបស់ យើងចំនួន១១៤ នាក់ បានទទួលអាហារូប ករណ៍សម្រាប់ ការសិក្សាថ្នាក់អនុបណ្ឌិត​ និង​បណ្ឌិតទាំងនៅក្នុងនិងក្រៅប្រទេស រួមមានសាកលវិទ្យាល័យនៅសហរដ្ឋអាមេរិក និងសាកលវិទ្យា ល័យជាច្រើនទៀត។ បច្ចុប្បន្ននេះ យើងមាននិស្សិតនារី ឆ្នើម ចំនួន ៧៤នាក់ ដែលមកពីបណ្តាខេត្តនានា ហើយកំពុងសិក្សាក្នុង សាកលវិទ្យាល័យ មួយ ចំនួនក្នុង រាជធានីភ្នំពេញ។